لحظة صب فنجان القهوة

هي لحظة في حياة كل واحد, يتختلف من واحد للتاني, احساس فريد باللذة في الحياة, بحاجة بسيطة قوي

احساس بصفاء الذهن و فن اليوجا و التامل.

بالنسبالي و القهوة بتتصب في الفنجان, و الوش بيتكون, و الدخان طالع بالراحة و هدوء كهدوء فنان رزين,و ريحتها الزكية,

هي احلى لحظة في حياتي , اكتر حتى من لما ابتدي ادوقها..

هي لحظة ترقب , لحظة اندماج, تشوق, لحظة يمكن لانتظار نجاح ما, لحظة لعبة حلوة, لحظة في الخيال,

لحظة من مليون لحظة في كل يوم بيعدي, بنعيش فيها احساس, او امل, صفاء,

لحظة بننفصل بيها عن العالم, يمكن كمان تسافر فيها لابعد مكان ممكن يوصله خيالك..

هي لحظة لا توصف, لانها لذة مشروعة و غير محرمة, بتستمتع فيها باي حاجة مهما كانت بسيطة,

بتتفتت حبيبات القهوة في المية السخنة,

لحظة ممكن تشوفها و انت بتشوف الشمس و هي بتشرق,و بتلقي ضوءها على شباكك و تتسلل منه لغرفتك و مكتبك, و تطلق احلامك للنور..

هي نفس اللحظة اللي تفاجأك الحياه بمفاجاة حلوة مش متوقعة,,

زي لحظة الوردة و هي بتفتح, و لحظة المولود و هو بيشوف الدنيا لاول مرة,

هي اللحظة الي بترجعك لاحلى لحظة قلبك بيحلم بيها...

يمكن تكون عندك لحظة تانية بتحسسك بكل ده,,بس المهم.. ان القهوة منبه للعقل, ممكن توصل بيها لتفكير اوضح,

عكس تماما ما تفعله مغيبات العقل الي ممكن حد يتوهم انها حتوصله للسعادة...

الفرق في الوسيلة هو نفسه الفرق بين الغاية, مشروعة ولا لأ...